Make your own free website on Tripod.com

Oswaldo DeLeón Kantule - "Achu"
Sobet - Artista Visual - Visual Artist

An Wek Soge
Achu pintando

An immar we onomait an anmar dule igar danigitba maicua an semai wegiyob soklemaidba: Inmar guable darbo bi, gannar gannar sobed, dukualegi immar sobleged, neg billigangibi daileged geb anmar sergan guabin dukuar sunmaked. We an be marga obared anmar sun daisale anmar bunmar mor maked gine, guilormar suar sobed gine, girmar garba sobed gine, dadormar igar wismalad narmaked gine geb anmar sahilagan sunmaked gine.

We anmar sergan immar sobemelad yobi, an immar onomaid Nan Nabguana dakedbali na senadapi, we sokledo Galu Dugbisye, deginiguar anmar daed geb immar burbaled amba eba dognabardo; an dule igar wismogad gine deginiguar an we iba naitgi an gudimoga, immar binigan abargine kege anmar we immar margi dukue sokledo, anmar immar gine geb dule baidmar immarmar ginye.

We igarmar sunnasokmalad sun narmalemalad, anmar igar danimalad amba dule baigan igar danimogad an ebusdado na ebo yoega geb na kannar ebo sobnonikodo emi iba gi immar narmalemamaid bular atolesagi an sobdedado an immar sobed sun anbina sunmakega.

We igar an kuamaksid geb an kannar odulosid an gebe idugar na an kurkin kangued gine geb an san burba yaba odogegi na gi pinna pinsaega, na dodoge yobi immar yeerdaile onogegala geb kaptaked yobi an immar sobmamaid ainidagoe an immar dobmalad anmar dule emi nek iskued abargi gudid obaregala, deginiguar we an immar sobed sunna bemar odulomolad be dakedba.

"Achu"

©2008 Oswaldo DeLeón Kantule diseño web AlSan